الخميس، 11 أكتوبر، 2012

وأخدت الشهادة :)

النهاردة رحت الجامعة عشان أجيب الشهادة بعد م قرروا يفرجوا عنها بعد عناد مرير ومرار طافح :)
لاقيت الحاجة بتقولى روح ادفع كمان عشرة جنيه !!!!!!
قلت ليييييييييييييه ؟!!!!!!
وعشان اييييييييييييه ؟!!!!
قالت بكل فخر : خدمات الكترونية !!!!!!!
أنا بقالى ست سنين مشفتش الست خدمات م بالك طلعت كمان الكترونية :))
واتبعوا معى سياسة ادفع وبعدين اشتكى !!!!
المهم انتهت محاولاتى فى إحداث أى عركة والسلام ودفعت واستلمت الشهادة :)
والحمد لله كنت مش حاسس بأى حاجة يمكن عشان مشاعرى متلخبطة ما بين الكآبة والخنقة والقرف !!!
واحد حيقولى شكلك كدة تقديرك ضعيف ويحاول يجرجرنى فى الكلام عشان أقول إنى جايب مقبول وفارق على الجيد 0.06 % ، لا بس أنا مش عبيط عشان أفضح نفسى إلعب على حد تانى :) 
اللى كان مدايقنى بجد بقة إن كل محاولاتى للفشل انتهت بالفشل :)
سقطت سنة ومهانش عليا أعدى صافى فى سنة ، وده كله عشان أقنع الحاج إنى مش مهندس ولا الهندسة دى سكتى ، بس الغريبة إنه كان مقتنع ولحد م اتخرجت إنى حأبقى معيد :)
اوعى حد يفتكر انى كاره الهندسة بالعكس دى عشرة :) 
بس كل الحكاية انى عايز اعمل حاجة بحبها !!!
ح يطلع واحد فيلسوف وييقولى م تبقى مهندس وتعمل اللى بتحبه !!!!
انت فاهم يعنى ايه تعيد حياتك من الأول عشان حاجة بتحبها ؟!!!
المهم الحمد لله عدى اليوم على خير ولم أنتحر ولم أنسى بالطبع أن أعطى كل دكتور درس لى عشر دعوات أو يزيد من نوعية : 
ربنا ياخده
ربنا ينتقم منه 
ربنا يقعدهاله فى عياله 
وبعدها بخمس ثوانى استغفرت ودعيت لهم هما وعيالهم !!!
أعمل إيه خوفى من ربنا وقلبى الطيب :))

هناك 14 تعليقًا:

  1. مبروك يا باشمهندس
    بس ماقلتش كنت عايز تبقى إيه غير مهندس؟

    ردحذف
    الردود
    1. الله يبارك فيكى ، واستعينوا على قضاء حوائجكم بالكتمان :) ، بس هى فى مجال اكتب
      ونورتى :)

      حذف
  2. شكلك هندسة اسكندريه قسم انتاج يا ميكانيكا
    والله الله يكون في عونك
    بس انت ليه شايل الهم كده
    هو انت شفت في مصر حد بيشتغل بشهادته
    يعني كده كده كنت لازم هتبدء حياتك من الاول
    بس الحمد لله انك فكرت كده
    احسن كنت تطلع معيد ولا حاجة تبقي ليلة سودا
    وما تعرفش تخلع من الهندسه خالص
    يوه نسيت الف مبروك علي التخرج
    كفارة يا جدع
    تحياتي

    ردحذف
    الردود
    1. الله يبارك فيك ، لا طب يا ريت اسكندرية جميلة

      حذف
  3. السلام عليكم
    مبارك لحضرتك على الشــهادة..وتقدر من دلوقتى تحقق كل أحالمك وتضع نفسك فى المكان اللى تحبه حتى لو مضطر تدرس تانى..وهى مشيئة الله إنك مهندس
    ومن رأيى إن حضرتك تفخر بالشــهادة..إن الحمدلله اتخرجت بعد مجهود وتجارب وفشل ونجاح..الشهادة دى مش مجرد إخطار باتمام المرحلة الجامعية..أعتقد إنها شهادة إنك مررت بكل لحظة فى المرحلة دى واتعملت منها.
    أســأل الله أن يرزقك كل خير ويحقق كل أحلامك..وكل شباب المسلمين.
    آسفة على الإطالة..مع تحياتى

    ردحذف
    الردود
    1. الله يبارك فى حضرتك اسعدنى مرورك وكلامك

      حذف
  4. محدش فى مصر بيدخل الكلية اللى نفسه فيها

    ولا بيشتغل الشغل اللى كان نفسه فيه

    بس اكيد الخير فى الطريق اللى ربنا اخترهولنا

    الف مبروك يا بشموهندس

    تحياتى

    ردحذف
    الردود
    1. الله يبارك فيكى وشكرااااااا

      حذف
  5. السلام عليكم...
    ذكرتني بكلماتك هذه ببعض مما كان عليه حالي أيام التخرج..
    أتذكر أنني اشتغلت في أكثر من10 وظائف خلال أول عامين بعد التخرج، رقم قياسي :)))
    لكن إذا أردت أن تصبح شيئا، فعليك أن تختار هدفا حقيقيا تصارعه بدلا من محاولة جر شكل إداريي الجامعة أو الدعاء على الأساتذة..
    تعرف.. لم أعرف قدر الأساتذة والمناهج التي تعلمتها في الجامعة إلا بعد أن دخلت مجال العمل وتمنيت أنني كنت كتفوقا في الجامعة لما في العلم من فوائد لا ندركها إلا بعد فوات الأوان..
    تقبل تحياتي...

    ردحذف
    الردود
    1. وعليكم السلام
      أسعدنى مرورك جدا أخ بهاء
      وكلامى عن الدكاترة ما كان إلا غضبة لأبى
      وشكرا على النصيحة

      حذف
  6. الف الف مليون مبروك

    وطبعا فاهمك يعني ايه تحب حاجه وتعمل عكسها
    انا اتحطيت في الموقف ده
    ومااااااااان
    ابويا كان مقتنع اني دكتوره
    وانا مش بعمل حاجه في حياتي بعد المذاكره غير الرسم
    وقامت الحرب العالميه السادسة
    لحد مادخلت فنون جميله مشيعه باللعنات :)))
    من بابا طبعا

    ردحذف
    الردود
    1. الله يبارك فيكى
      جميل جدا إنك تكونى عارفة هدفك من زمان
      أما ناس كتير ومنهم أنا كانوا لاغيين تفكيرنا وبيريحونا :)
      وبالنسبة لللعنات متخافيش من ورا قلبه :)
      أسعدنى مرورك

      حذف
  7. مبروووووك كويس ان اول زياره لى فى مدونتك الاقى خبر حلو زى ده ربنا يوفقك

    ردحذف
    الردود
    1. الله يبارك فيكى ده شرف ليا ويسعدنى زيارتك دايما

      حذف