السبت، 6 أكتوبر، 2012

والحرب لسة فى أول السكة


الفلاحين بيغيروا الكتان بالكاكي
و يغيرو الكاكي بتوب الدم
و بيزرعوك يا قطن و يا السناكي
و بيزرعوك يا قمح زرعة علم
و بيدخلوكي يا حرب فحم الحريقة
و بيزرعوكي يا مصر شمس الحقيقة
و إنت ميدان الحرب سينا البداية
إنت جنينة الصلب و النصر راية
إنت البكا و الغلب إنت الرحاية
إنت البارود و الحب و الحرب جاية
غنوا التلامذة الصبح للحرية
الفلاحين ضموا غيطان القمح
رفعوا الرايات بالفجر متندية
رفعوا السنابل بنادق
عبوا البنادق بارود
الرملة قادت حرايق
و النار في دم الجنود
و الحرب زي جناين الحرية
مهرة و مالهاش حدود
و الحرب لسة في أول السكة
إتفجري يا مصر
إتفجري بالحرب ينفلق النهار
إتفجري بالحرب ضد الجوع و القهر
ضد التتار
و إتسلحي بالحرب للحرية
و إتفتحي وردة بدم و نار
إتجمعي من ألف صرخة و ضحكة
و الحرب لسة في أول السكة
زين العابدين فؤاد
8 أكتوبر 1973 م 

هناك 8 تعليقات:

  1. جميله جدا
    بس ياريت تكبر الخط المره الجايه
    وياريت تلغى كلمه التاكيد فى التعليقات
    تحياتى

    ردحذف
    الردود
    1. متشكر جدا
      والله ياريت يا عمرو بس أخوك جاهل قولى ازاى وأنا أعملها ع طول :)

      حذف
  2. رائعة فقد ناقشت قضية هامة جدا ومازالت أمتن رغم خيراتها تعاني منها تحياتي الصادقة

    ردحذف
    الردود
    1. شكرا لمرورك الكريم ونسعد بأرائك دائما

      حذف
  3. مادام الكلام فيه شمس يبقا كل الكلام صح الصح
    :))

    ردحذف
    الردود
    1. عندك حق طبعا :)
      شكرا لمرورك الظريف وأسعد به دائما:)

      حذف
  4. والله ابهجتني يا أستاذ بتذكرك هذا الشاعر الفذ الأستاذ زين العابدين فؤاد. القصيدة رائعة وهي نفس القصيدة التي تسببت في كثير من المعاناة التي نالها الرجل لسبب بسيط وهو إنه بيحب بلده بشعره وبطريقته. والله انت رجل تمام. مع خالص تحياتي
    د. محمد زكريا الأسود

    ردحذف
    الردود
    1. أسعدنى جدا تشريفك يا دكتور
      ولا تحرمنا من أرائك القيمة
      تحياتى

      حذف