الأحد، 23 يونيو، 2013

كاندى ( 14 )


مصطفى : نفسى قوى أسمع صوتها !!

محمود : كلمها 

مصطفى : أعمل إيه ؟!!!
             إنت دماغك فيها حاجة ولا إيه ؟!!
             إنت ناسى هى عملت فيا إيه ؟!!

محمود : مش إنت يا ابنى اللى بتقول حتموت وتكلمها ، طب أقولك إيه ؟!!

مصطفى : حتى لو مت فعلاً إستحالة كرامتى تسمحلى إنى أهين نفسى أكتر من كدة 

محمود : لما بقولك إنك مكبر الموضوع بتزعل 
           إنت راجل ....... يعنى ولا يهمك
           وهى بنت زبالة ....... سورى عارفك حتزعل 
          ف ميهمش هى حتقول عليك إيه !!
          لأنها عارفة أصلاً إنها زبالة وإنك برقبتها 

مصطفى : ولااا ......... ولاااا ........ اسكت

محمود : طب أقولك فكرة حلوة 
          اشترى خط جديد ورن عليها واسمع صوتها

مصطفى : فكرة حلوة ؟!!
             دى فكرة طين !!
            ما أنت عارف مليش فى حركات المراهقين دى 
            يا أكون شجاع وأكلمها يا مكلمهاش 

محمود : طب أقولك
          هى معندهاش فيس ؟

مصطفى : أكيد عندها بس أنا معرفوش 

محمود : سيب الموضوع ده عليا 

....................... تانى يوم

محمود : خد يا درش وعد الجمايل

مصطفى : إيه ده يا جلاب المصايب ؟!!

محمود : أنا برضه ؟!!
          تصدق خيراً تعمل شراً تقلى
          ده أكونت حبيبة القلب يا سيدى :)

مصطفى : جبته إزاى ؟!!
             الله يخرب بيتك :))

محمود : عيب ...... ده سؤال تسأله :))

مصطفى : طب مين ياسمين دى كمان اللى مدينى إيميلها ؟!!

محمود : إنت ياسمين يا حبيبى :))

مصطفى : نعم ؟!!

محمود : أكونت بإسم بنت ، كنت بكلم بنات من عليه ، خش عليها بيه

مصطفى : إيه اللى بتعمله ده ؟!!
             مش حتبطل قذارة 
            أنا حأدخل من الأكونت بتاعى عادى

محمود : ملكش دعوة بيا ، سيبنى بقذارتى ببابا غنوجى
           واسمع كلامى وخش عليها بياسمين
           وقبل ما ترد ..... متكلمهاش ولا تكلم حد 
           عشان متبقاش قذر زيي ، اطمن بس على أحوالها

مصطفى : طب فهمنى ليه اللفة دى ؟!!

محمود : أفهمك وأكسب فيك ثواب
          عشان لو فيه خاصية تعرف مين اللى زار البروفايل متعرفش إنه سيادتك

مصطفى : أيوة كدة يا وديع :))
             أخيراً فهمتنى يا وديع :))

محمود :  تلميذ :))

هناك 4 تعليقات: