الأحد، 29 سبتمبر، 2013

عامان على خواطر مسلم :)


مش عايز أقول إنى شخص إنطوائى

بس أنا عادة مبعرفش أعبر عن اللى جوايا بالكلام

بأكتب من زمان 

يمكن من قبل حتى ما أحب القراءة 

بلاقى نفسى فى ورقة وقلم 

بأرتاح وبأحس إنى شيلت هم من على كتافى لما أكتب 

وبأرتاح أكتر لما أعرف إنى مشيلتش حد همى 

بهتم جدا باللغة وبحبها فوق ما تتخيلوا

ورغم ذلك لا أقف عندها

لأنى بإختصار مبدورش على الإحترافية 

أى حاجة تخطر فى بالى بأكتبها 

مقدرش استنى لما أنظمها فى أبيات أو أبنيها فى مقال

كان ليا تجربة فى 2008 مع التدوين بس للاسف 

لم تستمر لظروف الدراسة وظروف أخرى شخصية

وبعد الثورة 

بالظبط فى سبتمبر 2011

أنشأت حبيبتى :)


كنت محتار أسميها إيه ؟!!

قلت لازم تبقى عن أهم حاجة أنا بحبها

عنوانها يعبر عن شخصيتى وإهتماماتى 

لاقيت إن مفيش أهم من دينى وعقيدتى " الإسلام "

وكنت أيامها منبهر ببرنامج خواطر لأحمد الشقيرى

فجت كدة 


ودونت بإسم " مسلم مصرى "

وكنت قاصد إنى أبين إن عقيدتى ثم بلدى أهم ما فى حياتى

وإنى مسلم أهم بكتير من إنى مصرى 

وكتبت فى تعريف المدونة 

" خواطر حياتية لشخصية إسلامية "

وكنت قاصد أبين إن المسلم الملتزم ده 

إنسان مش ملاك

له تجارب حياتية زى أى واحد

بيعمل حاجات صح وحاجات تانية غلط

بيحب وبيكره 

بيعمل خير وبيشتم

بنى أدم زى كل الناس !!

كتبت حاجات كتير كان فى نفسى 

وحاجات أكتر كتبتها من سنين ولسة منزلتهاش !!

اتعرفت على ناس محترمة جدا

وقرأت كلام فى غاية الروعة 

ورغم إن مدونتى مغمورة 

إلا إنى سعيد بكل اللى بتابعوا ما أكتب ولو عدد بسيط

وممتن لهم وبشكرهم من أعماق قلبى على كلماتهم المشجعة

وبأحمد ربنا إنه ألهمنى إلى مجال التدوين

وكل عام وإنتى بخير يا خواطرى 

كل عام وإنتى خواطر مسلم :)))


هناك 4 تعليقات:

  1. كل عآم و خوآطر مسلم بخير و عقبال السنه المائه
    و فى عامك القادم تكون حققت احلامك البعيدة والقريبه كلها.و يسعدنى إنى اكون اول حد يهنئهك بمرور عآمين .
    اما بالنسبه للكتابة فهى نعمة من الله تجعلك تعبر عن أشياء ربما لا تقال او لا يمكن ان تقولها فتكون هى البديل و لعلنا في زمن أصبح فيه الورقه والقلم أوفي من البشر. تقيمى للمدونة هى فعلا رآئعه ومتنوعه جدا و جدبتنى الكثير من موضوعاتها مع ان هذا لا يحدث لي مع أى كتابات غالبا. أيضا هويتها المسلمه التى تجعلها في إطار الدين ومع وجود بعض الكتابات الإسلاميه اعطاها تنوعا جميلا تماما كما يجب أن تكون عليه حياة المسلم فهى لا تخلو من العباده والحب والسياسه والاحلام الدنيونه والآخرويه. و اخيرآ دمت بخير يا خوآطر مسلم وننتظر المزيد....لعلك ترضي

    ردحذف
    الردود
    1. وأنتى بخير
      وأسعدنى مرورك وكلماتك كثيرا
      وأتمنى أن تكون دائما خواطر مسلم عند حسن ظنك
      نورتى

      حذف
  2. كل عام وخواطر مسلم بخير وعقبال آلاف السنين وذكرى المدونة لا تموت :)

    ردحذف
    الردود
    1. وحضرتك بخير وسعادة
      ويسعدن دوام التواصل
      نورتى

      حذف