الخميس، 12 ديسمبر، 2013

عنى


بأعترف إنى إنسان غريب 

فى كل حاجة 

حياتى وهوياتى وأصحابى 

بأخاف أتكلم عن نفسى 

أو أوصف مشاعرى بصراحة 

بأخاف أغلط 

أى غلط ولو كان بسيط 

بأخاف أكون يوم مشهور

والغلط يتاخد عليا 

مع إنى أصلاً عمرى ما تمنيت الشهرة ولا بحبها

مش عارف نفسى أبقى إيه

مهندس ولا داعية ولا كاتب ولا ناشر ولا صحفى ولا إعلامى

مش عارف 

ولو خدت نصيحة حد بيقولى 

إعمل اللى إنت بتحبه

م هى دى المشكلة !!!

إن الحب عندى نسبى 

بأحب كل الحاجات دى نسبياً 

وساعات بأحس إنى بأكره حاجات أو بأعشق حاجات 

ممكن يكون السنة دى عندى حلم حأموت وأحققه 

أصحى فى يوم وأقول 

إيه العبط ده ؟!!!

ليا فكر وطريقة مختلفة عن كل اللى حواليا 

أنا ملتزم مفرط ومهندس مش شاطر ومدون مغمور 

الحاجات دى كلها ولا تفرق معايا

لو أنا سعيد

بس أنا بأعترف قدامكم أهه إنى مش سعيد

ومعرفش ليه ؟!!

أقرب حاجة من حاجاتى الغريبة 

إنى بقالى 25 سنة عايش وفاكر إنى بأكره الشكولاتة 

فجأة من شهر إكتشفت إنى بحبها جداً 

لما أمى قالتلى بس جرب !!!

وكمان البسكويت السادة أنا بكره طعمه جدا

وبأحب البسكويت المحشى 

ورغم ذلك مباكلش غير السادة عشان بيشبع !!!

حاجـــــــــــــات كــتــــــيـــــــــــــر  

أهمها

إنى عايز أحب 

أيوة أحب بنت أمال يعنى أحب راجل !!!

حأموت وأحب زى البنى أدمين

وشايف إنى كبرت 

وزهرة شبابى بتضيع وأنا سينجل :) 

وطبعا مش حينفع أحب 

إلا لما أشتغل وأكون نفسى 

عشان مابحبش أعمل حاجة فى الظل 

وبما أنى الحمد لله عندى من الدنيا ستر ربنا

فقدامى بتاع عشر سنين لما ابقى قادر أفتح بيت !!!

نفسى أفصل وأعيش يومى 

لأنى عارف أن رزقى لن يأخذه غيرى 

وزوجتى لن تتزوج واحد تانى 

مش عارف 

أسف لكل اللى حيقرأ التدوينة دى 

صدعتك وأكيد جبتلك إكتئاب 

بس مش مهم 

إشمعنى أنا يعنى :))

هناك 5 تعليقات:

  1. أزال المؤلف هذا التعليق.

    ردحذف
    الردود
    1. السلام عليكم
      كتبت كلام كتير...بس قرأت آخر سطور...لقيت ان تعليقى هيزود الاكتئاب الله أعلم..
      لنكتفى بالدعـــــاء :)
      ربنا يثبت حضرتك ويرزقك الخير ويدبر لك أمرك...
      والفضفضة بتريح كتيير وكذلك الاعتراف والصراحة مع النفس...والحل من عند ربنا إن شاء الله...
      المهم الرضا بكل ما يكتبه الله..
      تحياتى.

      حذف
    2. وعليكم السلام ورحمة الله
      كنت حأسعد بكلامك أكيد
      وسعدت كثيرا بدعواتك ولك بالمثل
      وربنا يرزقنا الرضا
      نورتينى

      حذف
  2. :) مش عارفة اقوللك اية بس بجد خلتنى ابتسم لشوية الفضفة اللى انتة فضفضتها عشان كلنا كدة كل الكلام اللى انتة قولتة انا حاسة بية وغيرنا كتير كلها امنايت بسيطة وربنا قادر يسعدنا ويعرفنا احنا عاوزين اية ونفسنا نبقى اية
    اصبر ..واحلم ..وادعى ...وحب مش لازم تكون جاهز من مجميعية يعنى :) ربنا يسعدك

    ردحذف
    الردود
    1. :)
      ويسعدك يا رب
      حأحاول أحب بس بعد شهرين
      أكون خلصت جيش بإذن الله :))
      نورتى

      حذف