الثلاثاء، 10 مارس، 2015

حكاياتى مع الستات


بالصدفة البحتة علمت من محرك جوجل أن أول أمس كان يوم المرأة، فشعرت أنها فرصة مناسبة للتكلم والحكي عن منطقة فى أغوار أعماقى قلما تحدثت عنها خوفاً من مواجهة نفسى أحياناً ومن نظرة البعض كثيراً .

" يا جماعة أنا بأحب الستات "

ليس حباً محرماً - والعياذ بالله - ، وإنما من باب قوله - صلى الله عليه وسلم - :" حبب إلي من دنياكم : النساء والطيب ، وجعلت قرت عينى فى الصلاة " ، فتلك تريد أن تعمل لأنه من حقها ، وتلك خانت زوجها لأنه لم يحتويها ، وتلك طلقت لأن الزوج لا يفى بإلتزماته الزوجية ، وتلك فتاة جامعية تصادق وتخادن الشباب لأنها طفلة لم تنضج بعد ، قلما أعيب على المرأة لشعورى الدائم أنها مقهورة ومظلومة سوى بعض النسوة اللاتى يتصدرن الشاشات وعناوين الصحف ويحتلون المناصب مدعين أنهن لا يأخذن حقوقهن ويتكلمن عن نساء هن أبعد الناس عما يواجهن من قهر وتهميش .

ولكن كعادتى فى كل ما أحب ، إنى أخشاهن وأخافهن وترتعد فرائصى منهن ، فغاية علاقاتى بالنساء أنهن أمى وعماتى وخالاتى ، لا أستطيع التعامل معهن ولا حتى مجرد الكلام ، من زميلات المدرسة والجامعة إلى زميلات العمل إلى إحداهن فى الشارع تسألنى عن مكان !!!

أشعر دائماً أننى لن أقبل إن حاولت التودد لإحداهن ، أعترف أنه شعور بالنقص لا أحاول تصريفه فى شئ أخر ، فأنا لست أحد هؤلاء الرجال حسنة الوجوه معسولي الألسنة ممن يجيدون التعامل مع النساء وإيقاعهن فى شباك العشق والوله .

حتى تلك المدونة التى أتمتع بكتاباتها أخشى التعليق علي كل ما تكتب خشية أن تظن أني أحد هؤلاء " العيال الملزقة " ، وحتى هؤلاء يأخذون ما يريدونه من النساء بطريقة أو بأخرى وبإرادتها الكاملة !!!

أشعر دائماً أن النساء كلهن جيدون إلا من ستوافق على الإرتباط بشخص مثلى ، فهى لا شك ستخدعنى وتهجرنى لتترك هذا القلب المسكين الذى ظل أعواماً ينظر ويشتهى الحلال ليكون خرقة بالية لا تصلح إلا ليمسح الناس بها أقدامهم عند باب إحداهن .

ومع الوقت تبين لي واقع لا مفر منه ، وهو أنه لا حظ لي مع النساء ، فهن يملن بطبعهن إلى أشخاص معينة ، جميل مثل الأتراك ، ثرى مثل رجال الأعمال ، مثقف مثل الأدباء ، يمارس الرومانسية كالشعراء والمطربين ، ورغم ميلهن لهؤلاء فهن عادة ما ينجذبون أكثر لأشخاص غير أسوياء ، وأنا لا من هؤلاء ولا من هؤلاء !!!


هناك 17 تعليقًا:

  1. ممارسة الجنس بانتظام تجنبك الكثير من الأمراض
    D:

    ردحذف
    الردود
    1. هو أنا مش فاهم إيه علاقة ده بالموضوع :)
      بس أنا متفق معاك جدا
      بس لما أتجوز بقى عشان مش طالبة معايا زنى :)
      نورت

      حذف
  2. ربنا يحبب فيك الجميع رجالة وستات

    ردحذف
  3. أكيد فيه من النساء من تتوافق
    مع شخصيتك ومبادئك وتدينك
    بس الست بصفة عامة بتحب الكلمة الحلوة
    هههههههههه
    خالص اعتزازى

    ردحذف
    الردود
    1. أكيد
      إبرة فى كوم قش :)
      بس أنا عايز واحدة تاخدنى كدة بهبلى بعبطى بأمراضى النفسية لكشة واحدة :)
      نورت

      حذف
  4. استاذ محمد ....

    اسهل حاجه انى اكتب لك تعليق ربنا يرزقك ببنت الحلال ويحبب فيك خلقه و بس لكن عن جد كلامك حسيت انه لازم يترد عليه باعتبار انى احدى بنات حواء خلينى بقى اتكلم معاك وبكل هدوء وصراحه لو عاوز تتناقش كمان مافيش عندى اى مانع بالعكس باحترم جدا جدا النقاش الموضوعى ...

    مش فاهمه انت بتحكم على اى نوع من النساء او البنات مع كامل الاحترام والتقدير لكل من قابلتهم فى حياتك لكن بكل تاكيد هن ليس المجتمع بأكمله ولا يمثلوا سوى نسبه بسيطه جدا جدا من المجتمع الكبيير الواسع اه بالمناسبه لو حبيت ترد عليا مش هاقول عليك من العيال الملزقه لاسباب كتير اهمها ان العيال الملزقه مش بتقول على نفسها كده .....
    يا سيدى الفاضل مين اللى قالك ان النساء بطبعها تميل الى هذا التركى الوسيم او رجل الاعمال او ... او .... ياترى فى دائرة علاقاتك لم تقابل امراه تزوجت من انسان عادى بل اقل من العادى لانها بكل بساطه انبهرت بجزء من شخصيته ماحدش شايفه غيرها ؟؟؟ رغم كونها امراه جميله ورائعه وتتسم بصفات رائعه وكل من حولها يتعجب كيف اختارت هذا الرجل
    بالنسبه للنساء المقهورات اللى تتحدث عنهن هناك من تضع نفسها موضع قهر باختيارها وهناك من اجبرتها الحياه على ذلك وشتان بينهما
    هؤلاء اللاتى يتصدرن الشاشات الغالبيه منهم الا من رحم ربى مش بيعرفوا يتكلم عن المراه المصريه او حتى العربيه .....

    دى شوية نقط بسيطه وكنت اتمنى اكتب اكتر من كده بس لانى فعلا لاحظت انى مش بتعرد غير بكلمتين وبس وكأن الكلام بفلوس يا سيدى قديما قالوا تحدث حتى اعرفك ولابد ان تتحدث مع المراه بما انك بتحب الستات يعنى تحدث معهن من امك او اختك او ستات العائله عشان تقدر تحكم عليهم صح مش انت بتخاف تقرب منهم وبتحكم عليهم لو كلامى ضايقك امسح الكومنت ومش هازعل اطلاقا

    تحياتى لشخصك الكريم

    ردحذف
    الردود
    1. يا مرحب يا أخت زهراء
      أولا بأطالبك إنك تقرأى التدوينة مرة تانية لأنى أظن إنك فهمتى غلط
      أنا هنا بأدافع عن الستات
      وعن وجهة نظرهم وأسباب إختيارهم وشايفها معقولة جدا
      وبعد إذنك طبعا أنا شايف إن من يخرج ممن قلت قليل
      ثانيا عشان بس متفهميش غلط أنا مابدورش على بنت الحلال ولا حاجة :)
      لأنى مش مقتنع بمبدأ التدوير على عروسة :)
      ثالثاً عايزانى أتكلم فى كومنت أكتر من كدة إزاى
      لو ليا وجهة نظر فى المكتوب بأكتبها
      غير كدة بأكتفى بتشجيع بسيط
      ثالثا أنا معنديش نساء فى العيلة
      العيلة كلهم رجالة :)
      ومش مكسوف على فكرة إنى أقول إنى عندى مشكلة حقيقية فى التعامل مع الستات
      ومرحب بأى رد :)

      حذف
  5. السلام عليكم
    انا عجبنى جدا كلماتك الجميله عن النساء والله لكن اختلف معاك فى شىء
    ان النساء مش بينجذبوا مثلا للى شكله شبه الاتراك أو الغنى أو اللى بيتمتع بمركز مرموق
    لا والله
    ولكنه الحب ياسيدى
    المراه تحب لسبب وكثيرا تحب من غير سبب
    ممكن تلاقى واحده متجوزه واحد اقل منها فى كل شىء لكن هى تعشق التراب اللى بيدوس عليه والناس تسأل هى ليه حبت ده هى ليه اختارت ده لكن المرأه فى حبها ليها فلسفتها الخاصه بيها
    ومش كل البنات زى بعض طبعا
    تحياتى ليك وبجد عجبنى الموضوع جدا
    سعدت بمرورى هنا

    ردحذف
    الردود
    1. أقولك نفس اللى قولته قبل كدة
      أنا مش بأنتقد اختيارات الستات
      بالعكس أنا أدعم هذه الإختيارات وأسبابها
      وأعذرينى أقولك
      كل البنات والشباب بيتحدثوا عن الأخلاق والعلم والثقافة
      وفى لحظة الإختيار الحقيقية
      لأ أصلها سمرة
      لأ أصله أصلع
      كلها معايير زائفة
      مع إحترامى الشديد لو جهة نظرك طبعا
      نورت

      حذف
  6. استاذ محمد ...

    اولا باشكرك انك فتحت باب النقاش
    ثانيا احسن حاجه فى الدنيا لما الوحد يكون عنده مشكله يواجه نفسه بيها ومافيش مانع ياخد راى الناس اللى حواليه عن جد بارفع لك القبعه

    ثالثا والله فاهمه انك بتدافع عن النساء ما هو كل اللى بيدافعوا عن النساء رجال وكمان كل اللى بيودى النساء فى داهيه هم الرجال ههههههههههههه
    على فكره لو انت بتدور على عروسه كنت جبت لك واحده على طووول هههههههه لانى باحب اوفق راسين فى الحلال ربنا يكتب لك اللى فيه الخير
    بص بقى نتكلم جد انت قولت انك بتحب الستات وماله بدل مافيش حرمانيه حبهم اتعرف عليهم افهم دماغهم طبعا انا باتكلم فى اطار الشرع والدين اكيد معاك زميله فى الدراسه او فى الشغل ايه المكشله انك تتكلم معاهم و الله كله تحت اطار الدين والشرع على فكره ماحدش كرم المراه ورفع من شانها زى الدين الاسلامى الحنيف وبعدين انت بتحب الستات وانت لا تعلم عن عالمهن اى شئ مش العيله كلها رجال انت اللى قولت كده يبقى بتحكم ازاى ياترى من خلال الافلام والمسلسلات او انك بتسمع من رجال العيله لازم انت تجرب وتشوف وتفهم مش يجوز تحكم ان عالم النساء ده عالم وحش اوى وهما صنف نمرود على فكره قبل ما انسى بيقال عنى ان نصيرة الرجل وده بجد مش هزار وخبرتى فى عالم الرجال اخدتها مش العيله ومن معارفى واصدقائى وزملائى وكلهم انماط مختلفه ونماذج وتربيات مختلفه
    انت عارف انا دخلت اعلق تانى ومش هازهق غير لو انت قولت لى كفايه لك والله ربنا يعلم انى بانصحك لوجه الله مش هاقولك عاوزه واحده ايس كريم شيكولاته وليمون هههههههه بص يا محمد احنا اخوات فى التدوين ويمكن عندى خبره فى عالم النساء على اد حالى يعنى مش خبيره بس زى ما قولت انى اجتماعيه بشكل غبى يعنى ممكن اعمل صداقه مع اى حد واسمع منه واحط اللى باسمعه لخبرتى المحدوده
    واضح انك شخص هادئ قرب من هذا العالم الذى تحبه بس نصيحه لوجه الله اوعى تقرب بقلب مفتوح عشان بس الستات دول صنف ربنا ما يوريك هههههههههههههه

    ربنا يوفقك وعن جد مش هاقدر اوصف لك مدى سعادتى بالحوار والنقاش معاك

    ردحذف
  7. زهـــراء
    :)
    "حرام عليك يا شيخة ده لسه صغار"
    بصوت فردوس محمد في فيلم شباب إمرأة D:

    ردحذف
  8. باشا.....
    ههههههههه ايه يا صديقي بس هو انا هاخطفه يادوب انا قولت حته كده من رأيي

    ردحذف
  9. باشا
    زهراء
    ..................
    بصدق هو ده اللى بيخلينى عمرى ما أفكر أتكلم على مشاعرى مع حد
    وللأسف كل فترة بأغلط وأتكلم
    عشان حضراتكم جايين تعملوا عليا حفلة
    نورتم

    ردحذف
  10. حاشا لله اننا نكون نعمل عليك حفله احنا حسينا انك اتضايقت من كلامي رغم أني حاولت ما اكتبش اي حرف يضايق وأنت بتقول بلاش فضايح غرضنا ونيتنا كانت شريفه اننا نهزر معاك ولو في دماغي ثانيه اني اتريق ونعمل حفله عليك كان في أسلوب تاني بس مش احنا الناس اللي تعمل حفلات على حد وعشان تعرف إن نيتي خير كان ايه اللي يخليني ادخل واعلق تاني واقولك اكونت الفيس عندك معلش يعني وأنا مالي أو اعرفك من فين أصلا كل الغرض اني قولت أساعد إنسان على أمل أن ربنا يبعت اللي يساعدني
    لو انت فهمت الموضوع حفله يبقى براحتك

    ردحذف
  11. محمد
    أنت زعلت بجد ولا بتهزر ؟
    باتكلم بجد والله
    بص أنا مش مستوعب أنك تكون زعلت ؛ لأني عارف أنك عارف أننا بنهزر ليس إلا.
    طيب ؛ في حالة إذا كنت زعلت .. حضرتك ما قبلتش الهزار أو ما شفتوش كده .. ماشي ؛ تمام ؛ حقك .. وحقك كمان أعتذر لك إذا كان تعليقي ضايقك وعصبك (مع أن الأولى اللي كانت تزعل من الألشة زهراء لو هي كانت قرت التعليق بحساسية أو في لحظة نرفزة وعصبية) ..

    بس أرجع وأقول لك أنا آسف يا محمد إذا كان تعليقي ضايقك ؛ وفهمته على أننا بنحفل عليك وبنستهزىء بمشاعرك وبنستخف بيها ؛ وده قسماً بالله العلي العظيم اللي عمره ما جه في بالي أصلاً وأجزم أيضاً أنه ما جاش في بال زهراء لأننا أصلاً ما نعرفش بعض ولا بنتكلم خارج التعليقات في مدوناتنا قدام الناس كلها.

    وبعدين ما زعلتش ليه من تعليقي الأولاني ؟؟ ما هو كان هزار برضه ؟؟ وبصراحة كنت متوقع أنك (أو أي زميل) هاتقلش عليه أو ترمي إفيه تتريق فيه ع التعليق اللي مالوش علاقة بالبوست ؛ أنا حبيت أخفف شوية نبرة الحساسية اللي في الموضوع ( مش إستهانة بيه) علشان الناس تتشجع وتتناقش وتتكلم بصراحة بدل التعليقات المملة المكررة اللي الواحد حفظها ؛ لأني لو كنت علقت بجد كان كلامي كله هيبقى هري وشوية نصايح لا تخلو من الاستعراض والفذلكة وكنت هتتخنق منها .
    طيب ؛ في حالة زعلت من التعليق أو التعليقين .. ما مسحتهمش ليه ؟؟ ولا كنت عصبت نفسك أو اتخنقت خالص ؟؟
    ما في داهية يا عم أي تعليق يزعلك أو يزعلنا من بعض ؟؟
    ووالله ما كنت هازعل ؛ بالعكس كنت هافهم أنك مش عاوز تهزر أو مش في الموود !!
    باكرر اعتذاري مرة تانية
    صافي يا لبن ؟؟
    أروح بقى أقرا البوست الجديد
    :)
    أخوك / شريف

    ردحذف
    الردود
    1. شريف باشا
      أكذب عليك لو قلت لأ
      فعلت حسيت إنكم بتستهزئوا بمشاعرى
      وأنا عمرى ما أزعل من الهزار على شخصى
      بس موضوع المشاعر ده حاجة تانية - وعارفك حتتريق على ده -
      بس أنا مش زعلان منكم ده بان فى تعليقى
      أنا زعلان من نفسى إنى اتكلمت عن مشاعرى
      لأني عندى قناعات شخصية إنه لا أحد يهتم بكونك سعيداً او تعيساً
      بس أحياناً بنحتاج نفضفض
      انت مش محتاج تعتذر لأنك ماغلطش
      دايما منورنى يا شريف

      حذف