الأحد، 5 أبريل، 2015

نادرة


في بلدنا الحبيب نادراً ما تجد عمل مناسب لما درسته وتعلمته من خراء علمي
وإذا وجدته فإنه يحتاج لخبرة والخبرة من العمل والعمل غير موجود ، وتظل تدور فى دوائر مفرغة لا نهاية لها!!!
وإن حنّ عليك أحدهم وجعلك تعمل بدون خبرة فإنه سيمتص دمك ويعطيك ما تقتات به إن كفى - من الأخر بتشتغل بلقمتك :) -
وهذا بالضبط ما حدث معي.

ولأن عملي الصباحي - الذي يدعون أنه فى مجالي كذبا وزوراً - لا يكفي مواصلاتى وأكلي وشربى، قررت أن أبحث عن عمل مسائي فى أى مجال حتى يقضي الله أمراً كان مفعولا،وهذه إحدي المرات :
رأيت صيدلية فخمة عليها أرقام مميزة موحدة زي بتاعة كنتاكي ، فقلت بالتأكيد هي مجموعة صيدليات ، أذهب وأسأل لعلنى أجد أي شئ وأحقق أملي بأن أكون مهندس وأفتح صيدلية :)

دخلت الصيدلية فإذا بي أجدهم كلهم بنات، ولأني كما تعلمون " نيلة " فى التعامل معهم قررت التراجع بدون خساير، ولكني تذكرت فى اللحظة الأخيرة أن نظرتهم لي لن تكون سوي " أحدهم يريد منشطات جنسية وامتلكه الحرج :) "
فالتفت فوجدت أخيرا شاب فقلت له :

- مين المسئول هنا ؟
- كلنا مسئولين
- يا عم مين الكبير ؟
- كلنا كبرات
فضحكنا قليلا ، ثم أشار لي وقال :
- دكتور محمد
كهل فى أواخر الأربعينات بلحية خفيفة جعلنى أقول فى سري " الحمد لله "
- أؤمر
- كنت بأدور علي شغل بعد الضهر ؟
- بس ده فرع انت تروح الإدارة ، بس قولي إنت خريج إيه ؟
- مؤهل عالي 
- أيوة يعني خريج إيه ؟
- ما هو أنا مش عايز حضرتك تتريق عليا 
- حأتريق ليه بس ؟
- أنا مهندس 
- لا حول ولا قوة إلا بالله
- يا ريتك اتريقت عليا :)
- روح الإدارة وإن شاء الله تلاقي حاجة تناسبك 

شكرته وانصرفت وقد احمرت أذناي من الحرج ، وعلمت أنه في بلدنا الحبيب أن تعمل فى غير مهنتك فهو عار ، وإن عملت فى مهنتك فستعيش عيشة الكفاف ، وما دام كدة ميت وكدة ميت أنا حأخاف من إيييييه :)

هناك 16 تعليقًا:

  1. السلام عليكم

    قد تكتسب خبرة إضافية من الدورات التعليمية على الإنترنت، فإنها ستزيد من النقاط الإيجابية في سيرتك الذاتية.
    وعلى كل حال من طرق بابا وجد واجتهد فستفتح له أبواب كثيرة بإذن الله.

    والله الموفق.

    ردحذف
    الردود
    1. وعليكم السلام ورحمة الله
      إن شاء الله أفعل
      وأنا أحاول جاهداً أن أتعلم
      شرفتنى وأتمنى دوام التواصل
      نورت

      حذف
  2. بلدنا أصبح العيش
    فيها معضلة لو
    أردت رضاء ربك
    ورضاء نفسك
    ورضاء الناس

    ردحذف
  3. الردود
    1. ربنا يخليلنا الحاج جوجل :)

      حذف
  4. للاسف
    هى دى مصر
    وده حال ناس كتير يابشمهندس
    تعرف كان فى شاب خريج طب تخيل بيشتعل مندوب مبيعات بعد الضهر
    بيلف عالبيوت ويبيع شامبو وصابون وحاجات من دى
    مش عارفه اقولك ايه
    دى مهزله

    ردحذف
    الردود
    1. ده نصيب ورزق
      وكل شئ بيد الله
      نورتي

      حذف
  5. ادى حال بلادنا وعلى العموم الشغل فى الاول والاخر مش عيب من غير مؤهل او بيه عادى مش هتفرق . ربنا يعين الجميع
    مساء الورد عليك

    ردحذف
    الردود
    1. هي دي الفكرة
      إن الشغل أصبح لدي البعض من المشتغلين أو أصحاب الأعمال أصبح عيباً !!
      نورتى

      حذف
  6. العمل كما تعلم ايا كان فهو مش عيب
    فيه دكاتره ومهندسين شغالين باعه
    والمشكله فى البلد الى إحنا فيها إن عدد الوظائف الحزمية محدود ولو فيه تعين بيخضع للواسطه والتقدير فطبيعى تلاقى الى معاه تقدير ومفيش واسطه ملوش مكان فالغالبية بيتجه للعمل الحر لو معاك فلوس هتفتح شغلك الخاص مش معاك يبقى اقبل بالى موجود لانه وبساطه مشكلة كلنا عايشينها وملهاش حل .
    والمشكله الاكبر القطاع الخاص زى مقولت بياخد من دمك وبيعطيك المرتب كانه بيحتك ومفيش ضمانات وأعتقد غن لو بقى العمل الخاص له مميزات الحكومى كل الشباب هتتجه له
    انا اشتغلت فى شركة كان ناقص يقولى مش تروح بيتكم ومتنمش بس الحمد لله ربنا تاب على منهم

    ربنا يوفقك وتحقق حلمك الخاص
    وبصراحة مفروض ال30 جيل الى فاتوا والى انا منهم منحطش أمل أوى فى الحكومة لان لسه الموظفين القدامى موجودين الى هما إتعينوا بدبلوم
    تحياتى

    ردحذف
    الردود
    1. إحنا بنسعي
      وصدقت فى كل كلمة تقولها
      المشكلة مش فى الشغل المشكلة في الناس اللي شايفاه عيب
      نورت

      حذف
  7. ومين فينا اشتغل شغل بمؤهله سواء عالي والا واطي حتي
    وحتي لما بتشتغل ف مجال شغلك مبتلاقيش الي اتعلمته في الواقع
    واول حاجة بيقولوهالك في الشغل انسي الي اتعلمته لانه مالوش لازمة
    قول الحمد لله انك لقيت شغل وان كنت لم توفق به فقل يارب وهو يرزقك

    ردحذف
    الردود
    1. للأسف هو ده الواقع
      لا ننفك من قول يا رب
      نورتى

      حذف
  8. ربنا يوفقك
    وتلاقي ما يرضيك

    ردحذف