السبت، 7 نوفمبر، 2015

ستات كسر :)


فى إحدى المكيروباصات اللى بنركبها أكتر ما بنقعد فى البيت 
ركبت أنا وابن خالى المتزوج حديثاً 
يشكو الزواج والنساء 

- الستات دول ولاد ستين كلب لازم تتجوز عليهم عشان يتعدلوا
- يا ابنى انت لسة متزوج من سنة وبتقول كدة ، أمال بعد عشر سنين حتعمل إيه ؟!!
- يا أخى والله أنا صابر عليها علشان البنت بس ، فين أيام الصحابيات ؟!!
- ربنا يهديك والله ، لو كل واحد بص على عيوبه ، هو انت زي الصحابة عشان هي تبقى صحابية ؟!!
وبعدين أصلح ما بينك وبين الله يصلح ما بينك وبين زوجتك 

وهنا تدخل أحد الجالسين أمامنا 
- لا والله الأستاذ عنده حق - يقصد ان خالي - 
- وانت متجوز أكتر من واحدة يا حج ؟ ( سألته ) 
- متجوز خمسة 
- إزاي ده ؟!!
- اتجوزت واحدة وطلقتها ومعايا أربعة دلوقتى 
- ولما رحت تتجوز تانى وتالت قلتلهم انك متجوز ؟!!
- أاااه ، وكانوا مبسوطين جدا
- يااااااااا راجل 
- خد الأكبر بقى 
- هو فيه أكبر من كدة ؟!!
- كلهم قاعدين فى بيت واحد 
- بتهرج ؟!! 
- لا والله ( ومبسوط وبيضحك )
- قلت : لا معلش يا حج أكيد الستات اللى بتتجوزهم دول كسرالنسوان 
- ليه يعني ؟
- ما اللى ترضى بالوضع ده مش طبيعية أكيد معيوبة :)

وكان كلامي معه على سبيل المزاح وإلا ما قلت مثل ذلك الكلام 
وطال الجدال بينى وينهم ( هو وابن خالي )
وفجأة 
سيدة كانت تجلس بجواره 
تقول بكل ضيق : اسكت بقى مش مكفيك الكلام ده كله !!
لأفاجئ فى النهاية أنها إحدى زوجاته !!
فيتملكني الخجل والغضب من لساني السليط وأبتلع لسانى حتى نهاية الطريق

هناك 4 تعليقات:

  1. إنت جبت الخلاصة كن صحابى حتى تجد صحابية
    الطيبون للطيبات والخبيثون للخبيثات
    قاعده لا يمكن إنكارها .. ولا يمكن تستمر الحياة بدونها

    ردحذف
    الردود
    1. رغم إن ده مش تفسير الأيه
      لكن المعنى صحيح
      نورت أخى جمال

      حذف
  2. اعتقد انك مغلطتش لدرجة انك تجيب مقص وتحطه على لسانك

    كان فعلا لازم تاخد بالك اه بس انت لا تقصد اي اهانة
    والمشكلة الحقيقية بقى في ابن خالك :D

    سنة جواااز وبيعمل كده ههههه
    لعل ربنا يصلح الحال مع العشرة والوقت

    وفعلا مهم اوي انه يبص لحاله الاول .. ميطلبش صحابية وهو مش صحابي

    حاول تخليه يكون سند لزوجته وانه يساعدها تحسن من نفسها
    وربنا يصلح أحوال المسلمين

    ومعلش زهقتك من النهاردة
    انا ما صدقت جات فرصة بصراحة

    ربنا يبارك في حضرتك :)

    ردحذف
    الردود
    1. أنا فرحان والله
      انت شرفتنى النهاردة
      وضيعت من وقتك فى قراءة تفاهاتى
      وربنا يصلح حاله وحالنا جميعا
      منورنى والله :)

      حذف