الأحد، 28 أغسطس، 2016

نفسي اتسدت


ماعرفش أقولك إيه ؟!!
بس أنا نفسي اتسدت
تخيلي لما يبقى أكتر واحد متفائل وبيدعو للتفائل
يبقى خلاص مش قادر

مش قادر أضحك ولا ألعب رياضة 
وماعنديش أي طاقة إني أكتب أو أقرأ 
أو حتى أفتح نقاش يزيد عن دقيقة مع أي حد

طبعا الظروف الإقتصادية للبلد 
والوضع المادي لي هو سبب رئيسي 
لكن السبب الأكبر هو أخلاق الناس 

اللي بيعرفك على أساس مصلحة 
واللى بيحترمك عشان تخلصله شغل 
واللي يبقى بينك وبينه كلام يروح ينقله
واللي يفتكرلك كلمة ماعلقش عليها زمان عشان يزلك بيها
واللي بيتفضل عليك علشان إنت اللى بتكلمه !!

الناس مابقتش مستحملة بعضها 
ومكشرين دايماً في وش بعض 
ده غير اللى دايماً مترقبين لأى مغفل 
يدور وشه بس الناحية التانية 
يخطف حاجته أو ينصب عليه 

تخيلي أنا أي حد ممكن ينصب عليا !!
لو انتى عاملة حسابك في واحد مصحصح كدة 
وبيتعلم من المطبات اللي بتعدي عليه 
يبقى أكيد مش أنا !!!

يمكن تشوفي إن الموضوع مش محتاج
وإني بأفور 
بس صدقيني 
أنا قربت أبعت جوابات للريس زي ما أحمد حلمي 
كان بيعمل في أسف على الأزعاج
وأقوله 
" ليه يا ريس الناس بتعاملني وحش ؟!! "
بس لاقيت إن الكلام ده لو وصله 
ح يريحني قوي :)
وأنا والله ما فارق معايا
بس نفسي أقابلك قبل ما أموت 

هناك 12 تعليقًا:

  1. روق يا جميل
    :))
    * على جنب ومن غير ما حد ياخد باله: كنت عاوز التي شيرت اللي في الصورة لفة يا محمد علشان خارج،، يا ريت تقلعه بعد إذنك وتوديه للداري كلين وأنا هاحاسبه زي بعضه. يا للا بقى ما أنا لسه قافش منك خمسين جنيه هناك تمن الفاكهة D: وبعدين أنت في مدونتك يعني تقعد بالفانلة عادي :))
    بالنسبة للبنطلون ............ ولا بلاش أحسن تضربني!! هاروح مشواري كده الجو حر :))
    بتنادي؟؟
    D:

    ردحذف
  2. واحشنى كتير يا محمد
    وكلماتك بتلمس الوتر الحساس فى عقل اى انسان بيفكر فى الى بيدور من أوضاع وأخلاق البشر
    ربنا يوفقك صديقى العزيز

    ردحذف
    الردود
    1. فنيك ماجتش البلد زي ما وعدتني
      ربنا يوفقنا جميعا

      حذف
  3. بص بقى يا متفائل سابقا...
    انت تحاول تشوف صحبه صالحة تدعو للتفاؤل وتتكلم معاهم عن الطاقه الايجابيه وابعد عن كل ما يعكنن على الواحد اشغل وقت فراغك بحاجات كويسه وبلاش طريقة التفكير دي هتتعب والله
    عجبني اوي الكيس اللي في الصوره امسح بس فمه الحزين ده وخليه يضحك

    ردحذف
    الردود
    1. :)
      الفكرة إن كل ما حولك يدعوك للتشاؤم
      بس حاضر
      ح أحاول :)

      حذف
  4. مش عارفه اقولك ايه
    بس ده واقع
    واقعنا المرير
    ومش مشكلتك انت بس
    لا ده فى ملايين بيشاركوك نفس القهر ده

    ردحذف
  5. عارف يا محمد الواحد من كتر ما وصل للمرحلة اللى انت فيها دى بقى فعلا مش قادر حتى يكتب اللى جواه ويعبر عنه وبقيت مستنى اى حد يقول اللى جوايا عشان اقوله ان ده كلامى اللى كنت عايز اقوله
    احسنت صديقى

    ردحذف
    الردود
    1. ربنا يجعلنا سبب في مواساة بعضنا

      حذف